Dokument-Nr. 16840
Bley SJ, Bernhard Karl Anton Ulrich an Pius XI.
Köln, 14. Februar 1924

Beatissime Pater,
provolutus ad pedes Sanctitatis Tuae infrascriptus Praepositus Provinciae Germaniae Inferioris Societatis Jesu haec proponit:
Quae est Sanctitatis Tuae erga omnes Filios Tuos in Germania maxima penuria rerum omnium ad vitam necessariarum impetitos paterna cura et benevolentia, maxime nobis, Societatis Jesu alumnis, innotuit, cum per intercessionem Reverendissimi et Excellentissimi Nuntii Apostolici, Domini Eugenii Pacelli, facultas concessa est, ut et ab ipso nobis subministrarentur stipendia missarum et subministrata ita componerentur, ut singulis missis assignaretur stipendium dimidii dollarii Americani.
Interim vero et valor pecuniae Germanicae iterum multum decrevit, cum simul pretium rerum omnium multo auctum sit. Unde fit, ut hodie stipendium dimidii dollarii multo minus valeat, quam victus cotidianus constat. Valor marcae stabilitus hanc discrepantiam minus visibilem quidem reddit, sed non modo non aufert, sed potius auget.
Quapropter humillime peto, ut in posterum liceat tot stipendia missarum componere in unum, ut singulis missis stipendium unius dollarii assignetur.
Et Deus etc.
Sanctitatis Tuae
humillimus in Christo servus
Bern. Bley SJ
Praepositus Provinciae Germaniae inferioris
Societatis Jesu.
Empfohlene Zitierweise
Bley SJ, Bernhard Karl Anton Ulrich an PiusXI. vom 14. Februar 1924, Anlage, in: 'Kritische Online-Edition der Nuntiaturberichte Eugenio Pacellis (1917-1929)', Dokument Nr. 16840, URL: www.pacelli-edition.de/Dokument/16840. Letzter Zugriff am: 29.03.2024.
Online seit 18.09.2015.