Dokument-Nr. 7516
Schumacher, JakobEsch SJ, Ludwig an Benedikt XV.
Köln, 27. Juni 1921

Beatissime Pater!
Jacobus Schumacher Sacerdos Coloniensis Diocesis et unionis adolescentium catholicorum in scholis superioribus studentium cui nomen "Neudeutschland" praeses et Ludovicus Esch Sacerdos Societatis Jesu eiusdem unionis secretarius generalis ad pedes Sanctitatis Vestrae provoluti humillime orant ut haecce sibi exponere liceat.
Unio nostra duobus abhinc annis auspicantibus omnibus Reverendissimis Germaniae Episcopis orta tam praeclara interim incrementa sumpsit, ut efficaciam apostolicae illius benedictionis, quam Sanctitas Vestra nobis identidem elargiri dignata est, agnoscere magna cum laetitia et quasi manibus adtrectare potuerimus. Vindelicet res eo nostra feliciter adducta est, ut iam 25 milia puerorum adulescentiumque scholarum Germaniae superiorum Unioni nostrae se aggregaverint sub eiusque vexillo certamen certandum pro fide erga Divinum nostrum Salvatorem Eiusque sponsam Ecclesiam servanda susceperint. Tamvero cum hi pueri adolescentesque pro maiore parte ex iis parentibus proveniant, qui in modica re familiari sunt constituti, quoniam
97v
apud nos in Germania homines medii ordinis constat inopia atque miseria plus ceteris laborare, nobis spiritualibus huius iuventutis ducibus officium caritas [sic] oritur in temporalibus quoque curis opem ferendi. Ac pro tempore quidem vacationum quae instant autumnalium necessarium est, ut plurimis ex his pueris occasionem aliquam ruri vel ad maris oram comparemus recuperandorum virium alendorumque corporum. Quod si exequi potuerimus, occasionem simul nanciscemur plurimis ex pauperibus scholaribus tradendi per aliquot dies exercitia spiritualia, quae tantopere desiderant. Verum enim vero ad hoc caritatis opus pecuniam nobis deesse magno cum dolore videmus. Quare tanta nostrorum puerorum necessitate, quantam cotidie oculis cernimus, quamvis immodesti precatores apparere possimus, incitamur, ut Sanctitati Vestrae communi Christianorum parenti supplicemus, ut nobis, si fieri potest, auxilio veniat sive pecuniam sive alimenta donando.
Nos in vicem ferventissimas ad Deum preces pro salute Sanctitatis Vestrae offerimus.
Jacobus Schumacher.
Praeses.
P. Ludovicus Esch S.J.
Secretarius generalis.
Empfohlene Zitierweise
Schumacher, Jakob an BenediktXV. vom 27. Juni 1921, Anlage, in: 'Kritische Online-Edition der Nuntiaturberichte Eugenio Pacellis (1917-1929)', Dokument Nr. 7516, URL: www.pacelli-edition.de/Dokument/7516. Letzter Zugriff am: 28.03.2024.
Online seit 14.05.2013, letzte Änderung am 25.06.2013.