Dokument-Nr. 8765
Hohenzollern-Sigmaringen, Wilhelm von
an Benedikt XV.
Sigmaringen, 17. Februar 1921
filiali vere pietate adductus ac paterna Sanctitatis Vestrae benevolentia confisus audeo humillimam filii nurusque petitionem supplex ad Sanctitatis Vestrae pedes deponere.
Cum Deus ex immensa sua gratia ineunte mense Martis nepotem nobis donaturus sit, omnes nos perbeati ac gratissimi erimus, si Sanctitas Vostra tantum nobis favorem impertierit, ut patrini in sacro baptismate munere fungi dignaretur.
Sane filii mei et ipsemet ego non ignoramus importunam videri nostram petitionem impraesentiarum, sed, quae quotidie intuemur et experimur, tristia ac desperata, animumque deprimentia ac sensus religionemque violantia in coelum suspicere nos faciunt omnipotentis Dei implorantes auxilium et benedictionem. In Deo, inquam, unice solatium, quo indigemus, idque fidei robur eamque constantiam invenimus, ut crucem humeris nostris impositam christiana patientia animoque submisso portare valeamus; immo portamus certissima cum fiducia, hisce verbis confisi: In hoc signo vinces.
Quid igitur mirum, Santissime Pater, instante momento, in quo cordibus nostris omnipotens et misericors Deus benedictionem, felicitatem, laetitiam infusurus est, ut pios ac
117v
fideles catholicae ecclesiae filios, singulari fiducia ad totius orbis cristiani caput nos converti ac domui nostrae ad oppugnandum malum, quod hodie dominatur in mundo, fidei robur, in bono confirmationem ac parentibus prolique coelestem benedictionem exorare? Quod denique tam felix faustumque omen et pignus salutiferae benedictionis proli totique familiae aborundiae inveniatur ac Sanctitatis Vestrae nomen: Benedictus.Quodsi Sanctitas Vestra devotis precibus nostris pronas aures praebuerit, tantum sprituale beneficium sincero gratoque animo, indefessa oratione, eorum quae nobis ex sancta catholica religione incumbunt, officiorum fideli executione, pia erga sanctae ecclesiae caput observantia strenue pensabimus.
Ut autem, firma domus meae antiqua traditione, nepos noster in sancta catholica religione eruditus atque institutus prospere adolescat, divinae imploro auxilium gratiae et,qua par est, reverentia Apostolicam benedictionem peto cum summa pietate perseverans
Sanctitatis Vestrae
devotissimus atque obedientissimus
filius
Gulielmus Princeps de Hohenzollern.