Dokument-Nr. 8832
Bertram, Adolf Johannes an Pacelli, Eugenio
Breslau, 22. Januar 1922

Excellme ac Revdme Dne!
Una cum Excellentiae Vestrae honoratissimis Litteris die 19. h. m. – Nr. 22993 – heri accepi syngraphas tres complectentes 1.560.412 Marcas monetae germanicae destinatas ad sanandos infantes tuberculis infectos. Statim hasce syngraphas tradidi Bancae "Deutsche Bank" ad distributionis negotium proximo tempore expediendum.
Est ultimum beneficium, quod sanctae memoriae Summus Pontifex Benedictus XV hodie ad aeternam requiem a Deo vocatus exhibuit egenis Germaniae infantibus. Quanta gratitudine infantes una cum sacerdotibus ad altare invocabunt Divinum infantium Amatorem, ut sit dilectissimo nostro summo Pastori Remunerator clementissimus!
Dignetur quaeso etiam Excellentia Vestra vivissimae gratitudinis sensus Eminentissimo Domino Cardinali Secretario Status pro precum oblatarum benevolentissima commendatione manifestare.
Summa cum aestimatione ac devotione persevero esse
Excellentiae Vestrae Revdmae
obsequiosissimus servus
A. Card. Bertram,
Princeps Eppus Wratislaviendis.
Empfohlene Zitierweise
Bertram, Adolf Johannes an Pacelli, Eugenio vom 22. Januar 1922, Anlage, in: 'Kritische Online-Edition der Nuntiaturberichte Eugenio Pacellis (1917-1929)', Dokument Nr. 8832, URL: www.pacelli-edition.de/Dokument/8832. Letzter Zugriff am: 28.03.2024.
Online seit 31.07.2013.