Dokument-Nr. 3904
Stolberg-Stolberg, Hermann Joseph Graf zu
an Benedikt XV.![Kurzbiografie anzeigen](./resources/images/document/i-icon.png)
Paderborn, 07. Oktober 1920
Pluries iam Sedi Apostolicae de Societatis sancti Bonifatii factis et – Deo sit laus – fructibus uberrimis referre nobis licebat. Quae societas a sancto Bonifatio, Germanorum Apostolo, cuius praeconium Sanctitatis Vestra per Epistolam Encyclicam omni populo nuperrime enuntiavit, nomen accepit eiusque praeclarissimum exemplum sequens catholicis per Germaniam, Austriam, Helvetiam, Daniam inter haereticos et schismaticos in summo animarum periculo dispersis succurrere studet. Iam inde ab anno 1849 ad Dei gloriam pro augmento cultus divini et salvandis animis pretiosissimo sanguine Christi redemptis eleemosymas collegit, quarum summa 100.000.000 frs. excedit, catholicis in dispersione positis ecclesias, scholas, orphenotrophia aedificavit et missionarios, ludimagistros, parochos misit. Suo modo effectum est, ut in permuti civitatibus Novi Testamenti sacrificium per tot generationes interruptum denuo celebretur, innumerabiles catholici matri ecclesiae servari et non pauci acatholici ad gregem Christi reduci potuerint.
Quare praedictarum terrarum Episcopi Societatem sancti Bonifatii praeter omnes alias pias associationes commendare non cessabant, et Summi Pontifices Pius IX, Leo XIII, Pius X p. m. benedictionibus iugiter foverunt et privilegiis benignissime donaverunt.1 In memoriam revocare liceat solummodo privilegia a Leone P. P. XIII die 15. Martii MDCCCCI concessa pro sacerdotibus in associationem s. Bonifatii rite adlectis.2 Sed ut sacerdotum in praegatum nostrum finem fervor etiam novis Ecclesiae beneficiis
15v
denuo alliciantur, humillime precamur, ut Sanctitas Vestra privilegia anteriora confirmare et insuper facultatem concedere dignetur benedicendi et imponendi sub unica formula quinque scapularia Sanctissimae Trinitatis, Passionis Domini Nostri Jesu Christi, Beatae Mariae Viginis sub respectivo titolo Immaculatae conceptionis Septem Dolorum et Montis Carmeli necnon benedicendi unico s. Crucis signo coronas precatorias et rosaria non excepta applicazione indulgentiarum s. Brigittae et canonicorum Ordinis s. Crucis nuncupaturum, quae ultima gratia (exempli causa) etiam a Sanctitate Vestra concessa est sodalibus Unionis Apostolicae die 30 mensis Maii 1916.Gratiis praedictis, ut Sanctitas Vestra aliud privilegium addere velit, enixe et instantissime rogamus. Egestas maxima et miseria flebilis populi Germaniae bellum infaustissimum subsecuta est, ideo Sanctitas Vestra cum in puerorum exurientium terrae nostrae levamen summam magnam munifice donavit tum per Epistolam Encyclicam "Paterno iamdiu animo" omnes Ecclesiae Ordinarios, ut ad id opus praeclarissimum conferrent, adhortatus est. Sed sacerdotes ipsi, qui pauperes et miseros iuvare, esurientes nutrire, nudos operire debent, aerumnis maxime premuntur. Quibus auxilium et allevementum afferri posset, si eis missarum stipendia largiora praeberentur; taxa autem dioecesis Paderbornensis, in qua Societas s. Bonifatii domicilium habet, pro missa lecta tantum tres marcas adaequat, pro quibus sacerdos sustentationem unius diei omnino habere nequit, sed 25 circiter marcae ad sustentionem unius personae pro uno die requiruntur. Saepissime societati nostrae summae quaedam offeruntur "pro celebrandis missis", quarum numerus non assignatur. Quare ut Sanctitas Vestra facultatem nobis tribuat, omnibus his in casibus stipendium 25 marcarum pro una missa lecta determinandi humillime deprecamur. Pluries etiam stipendia ultro nobis mittentur cum designazione certi numeri missarum, quae ad unam certam intentionem legantur; si missae assignatae singulae legi deberent, presbyteris egentibus minime succurreretur. Accedit, quod non solum in dioecesi Paderbornensi, sed etiam in omnibus Germaniae dioecesibus tot stipendia missarum secundum taxas dioecesanas numerata offeruntur, ut Ordinarii ea in terras alienas mittere cogantur, ubi propter deminutum valorem pecuniae nostrae reducuntur. Quae omnia Sanctitati Vestrae pernota sunt; cum
16r
etiam in Italia s. Congregatio Consistorialis iam anno preterito reductionem missarum permiserit. Nobis tantum liceat, stipendia pro una certa intentione ultro oblata , ita componere, ut unum stipendium 25 marcas attingat, quamvis taxa dioecesana minorem summam complectatur; sed stipendia minora, pro variis intentionibus oblata, quae sine confusione intentionum componere non possunt, Ordinariis trademus. Quibus stipendiis inprimis sacerdotes nostros in dispensione inter catholicos positos, quorum sustentatio societati nostrae incumbit, tum etiam alios sacerdotes egentes iuvabimus. Quae facultas, quamdiu haec insolita perdurabit, nobis concedatur.Cum confidenter speremus, indulta praedicta et christifidelium animis saluti et societati nostrae utilitati fore, Sanctitati Vestrae pedes amplectentes, ut nobis concedere digneris, rogamus
Sanctitatis Vestrae
filius oboedientissimus
Herman Comes in Stolberg
Praeses generalis Societatis s. Bonifatii.
1↑An dieser Stelle hds. am linken Seitenrand, vermutlich von von Stolberg-Stolberg, notiert: "alleg. I.".
2↑An dieser Stelle hds. am linken Seitenrand, vermutlich von von Stolberg-Stolberg, notiert: "alleg. II.".