Dokument-Nr. 9703
Tilmann, Franz
: [Kein Betreff]. Trier, 04. September 1922
Joseph Banner, e dioecesi Treverensi oriundus, sed per complures jam annos extra eandem degens, duos fere ante menses Episcopum necnon Vicarium Generalem adiit, ut nomine et jussu Episcopi in universitate Bonnensi studiis theologicis incumbere possit eum in finem, ut clero Treverensi possit adscribi, sed de facto in missionibus paganorum imprimis in Africa munere suo sacerdotali fungatur. Hucusque studia ludimagistri bene se perfecisse dixit. Sed omnino tacebat de eo, quod scripsit in litteris ad Beatissimum Patrem datis, se jam in Congregatione fratrum laicorum quadam per multos annos degisse et illam ante votorum emissionem deseruisse.
Reverendissimus Episcopus necnon Vicarius Generalis petenti commendaverunt ingressum in congregationem quandam pro missionibus externis institutam, sed spes illi aperiri non potuit, ut rebus sic stantibus clero Treverensi posset adscribi. Imprimis esset investigandum, quam congregationem fratrum laicorum deseruerit et qua de causa. In Saffig non amplius deget, et nescimus, ubi nunc commoretur.
Tilmann
Vicarius Generalis