Dokument-Nr. 18681
Klein, Kaspar an Pius XI.
Paderborn, 17. Juni 1927

Anlage, Schreiben, Masch.

Protokollnummer	37810
Prot.-Nr. Vaktikan	63574
Archivsignatur	AAV, Segr. Stato, Anno 1927, rubr. 88, fasc. 2, fol. 17rv.

Copia

Beatissime Pater!
Episcopus Paderbornensis infrascriptus humiliter Sanctitati Vestrae preces parochi hodierni ecclesiae ad Sanctam Crucem in Oppido Nordhausen sequentes commendat et instantissimum suum suffragium addit:
Anno DCCCCLXII sancta Mathildis regina e nobili Widukindi genere nata, Henrici I regis dignissima conjux, Ottonis Magni regis Germaniae imperatorisque Romanorum et sancti Brunonis archiepiscopi mater, monasterium ecclesiamque Nordhusii construxit et munificentissime dotavit. Cui praeclarae ecclesiae anno circiter DCCCCXC Otto III rex Germaniae imperatorque Romanorum Reliquiam sanctissime Crucis tria millimetra latam et duodecim millimetra longam in pretiosissimo reliquario formae crucis argenteo atque multis gemmis adornato inclusam donavit. Ecclesia praedicta monasteriumque titulo "S. Crucis" insignita sunt et ecclesia adhucdum "Dom zum hl. Kreuz" (il Duomo della santa Croce) nuncupatur. Septem fere saecula per reliquia salutifera venerationi proposita libentissime a piis christifidelibus undique confluentibus frequentari et coli consuevit, praecipue in festis Inventionis et Exaltationis S. Crucis. Processiones sollemnissimae ad cultum tanti redemptionis instrumenti augendum et ad christifideles roborandos factae sunt, quibus clerici religiosaeque familiae omnium ecclesiarum monasteriorumque totius civitatis interfuerunt. Ast hic salutaris cultus turbulentissimis et tristissimis magnae defectionis

17v

Protestanticae necnon belli triginta annorum nuncupati temporibus fere abolitus est et omnino desiit, cum anno MDCLXXV ille Joannes Huke canonicus Nordhusianus reliquiarum octoginta thaleris (trecentis libellis aureis) venumdare praesumpserat. Fideles a veritate catholica defecerunt, monasteria evanuerunt, ecclesiae catholicis detractae sunt. Nihil nisi ecclesia S. Crucis in illa civitate catholicis remansit. Neque etiam memoria antiquorum festorum S. Crucis interiit, in quibus adhuc hodie illae notissimae nundinae Nordhusianae habentur.
Paulatim Divina Gratia paroecia S. Crucis, quae est unica in illa civitate et amplectitur 4 alia oppida et 45 pagos, restituta est et in dies crescit. Hodie sunt Nordhusii 1800 paroeciani, qui inter 36000 acatholicos habitant. Maximum solatium toti paroeciae et potentissimum incitamentum virtutis permultis catholicis illa in regione dispersis esset, si pristinae sollemnitates processionesque in honorem S, [sic] Crucis reviviscerent. Qua de causa parochus et fideles paroeciae Nordhusianae instantissime a Sanctitate Vestra Reliquiam Ss. Crucis – nimis <Minus>¹ parvam, si possibile est – petunt et promittunt libentissime, ut dignum reliquiarium illi antiquo simile comparetur et in futurum veneratio hujus optatissimae Reliquiae magis magisque augeatur, quatenus omnes amore crucis accrescant. Accedit, quod civitas Nordhusiana jubilaeum fundationis oppidi millenarium diebus 28. et 29. m. Maji anni sequentis celebrandum praeparat. Qua fausta occasione quoque ab acatholicis permagni aestimaretur, si ecclesia S. Crucis, quae est pristinorum temporum electissima testis, suum celeberrimum sanctum signum reciperet, quod est efficax signum praedicationis veritatis et sceptrum Regis pacifici, qui omnes errantes ad unitatem Ecclesiae revocare dignetur.
Etb Deus...
+ Casparus,
Episcopus Paderbornensis

1↑Masch. gestrichten und eingefügt.

Empfohlene Zitierweise

Klein, Kaspar an PiusXI. vom 17. Juni 1927, Anlage, in: 'Kritische Online-Edition der Nuntiaturberichte Eugenio Pacellis (1917-1929)', Dokument Nr. 18681, URL: www.pacelli-edition.de/Dokument/18681. Letzter Zugriff am: 02.04.2025.

Online seit 25.02.2019.