Dokument-Nr. 18754
Hartmann, Alexander
Sauer, NikolausKretschmer, PaulHeduschke, Jurij (Georg)Köhler, Georg an Sbarretti, Donato Raffaele
Bautzen, 09. November 1926
Excellentia Vestra
die 22. Octobris huius anni Reverendissimo Decano Capituli Cathedralis ad St. Petrum Budissinensis humiliter subscripti oretenus intimavit esse opportunum pro concludenda quaestione de lege fundationis Capituli, si Capitulum ipsum declarare vellet, utrum fortasse Gubernium civile Saxoniae Capitulo difficultates afferre posset denegando eiusdem iura et privilegia, si quaestio de lege fundationis Capituli Sacrae Congregationi Concilii exposita ab ipsa Sacra Congregatione in sensu negativo decideretur, ita ut antiqua Statuta Capitularia quoad electiones Decani et Canonicorum essent ad norman iuris communis reformanda.
Capitulum Cathedrale ad St. Petrum Budissinense re in sessione die 3. huius mensis habita mature et diligentissime discussa perpensisque omnibus circumstantiis tenore huius declarat: usquedum hodierna Constitutio Germanica (Deutsche Reichsverfassung) in vigore manebit, a Gubernio neque Germaniae neque Saxoniae aliquid timendum est contra iura Capituli, si fortasse lex fundationis Capituli qua talis a Sacra Congregatione agnosci non possit.
Annis praeterlapsis tempore praesertim revolutionis Germanicae re vera Capitulum timuit, ne Gubernium civile rei catholicae
246v
infensum quamlibet ansam
quaerere posset ad deneganda iura Capituli. Cum vero res politicae interim sint consolidatae
et ex ipsa constitutione Germaniae (D.R.V. art. 137) collationes beneficiorum fiant sine
ulla cooperatione status civilis vel inferiorum eius officiorum, Gubernium Capitulo nequit
afferre difficultates, si Statuta Capitularia quoad electiones reformantur, neque adsunt pro
tempore iuridica fundamenta in legislatione civili, ut Gubernium sese immiscere possit
collationibus Dignitatis vel Canonicatuum Capituli. Omni qua par est reverentia et oboedientia permanet
Excellentiae Vestrae
obsequiosissimum et devotissimum
Capitulum Cathedrale ad St. Petrum Budissininense.
sig. Alexander Hartmann, Decano Capituli Cathedralis.
sig. Nicolaus Sauer, Praelatus domesticus, Can. Cap. Senior
sig. Paul Kretschmer, Can. Cap. Cantor
sig. Georg Heduschke, Can. Cap. Scholasticus.
sig. Dr. Köhler.