Dokument-Nr. 5326
Linneborn, Johannes
an Gasparri, Pietro
Paderborn, 05. August 1920
Sanctitas Tua, Beatissimus Pater Benedictus PP. XV, perdurante bello infaustissimo cum populis totius orbis terrarum tum Nationi Germanae paternae caritatis et misericordiae piissimae testimonia iterumque dabat; finitoque bello inprimis infantibus et parvulis fame et aerumnis exhaustis per largas donationes succurrebat. Sed eheu miseria et egestas non solum parvulorum sed omnium incolarum infelicis patriae nostrae adhuc perdurat neque infantium catholicorum quidem miseriae Sanctitas Sua omnino mederi potuit. Quare "Associatio de sancto Bonifatio" (in lingua vernacula: Bonifatius-Verein für das katholische Deutschland) recordans de verbo Domini: Frange esurienti panem tuum et egenos vagosque induc in domum tuam, cum videris nudum operi eum et carnem tuam ne despexeris (Is. 58,8) quattuor sacerdotes in Americam Septemtrionalem missura est, qui alimenta, frumenta, vestimenta, pecuniae munera colligant. Quod consilium episcopatus totius Germaniae inprimisque Adolfus S. R. E. Presbyter Cardinalis Bertram Wratislaviensis et Excellentissimus Dominus Nuntius Apostolicus Eugenius Pacelli laudant votisque optimis prosequuntur. Qui sacerdotes sunt: R. D. Doctor H. Weinand ex Paderborn, R. D. parochus Schlatter ex Paderborn, R.D.
126v
parochus Bruening ex Cumberland Md. in Amerika, qui pro tempore in Germania vitam agit, R. D. capellanus Wienhold ex Gelsenkirchen, dioecesis Paderbornensis.Quod opus praelaudatum felicem effectum solummodo sortiri poterit, si Eminentia Vestra id Delegato Apostolico in Washington, omnibus Americae archiepiscopis, episcopis, presbyteriis universoque populo catholico recommendare non dedignaretur. Eminentissime Princeps! Confidenter speramus Te hoc opus Deo gratissimum pauperibusque catholicis terrae nostrae utilissimum adiuturum esse, cum Te miserae patriae nostrae benevolum et amicum esse persaepe experti simus. Sed et Sanctissimus Noster Benedictus PP. XV catholicos Americanae Unionis, ut miseris praesertim in Europa Meridionali degentibus, succurrerent, adhortatus est et fideles catholici Americani Sanctitatis Suae adhortationibus libentissime obsecuti sunt. Etiam "Associatio nostra de sancto Bonifatio" saepius est laudata et commendata; Pius PP. X. die 6. Mensis Decembris MCMXIII enuntiavit: "Equidem arbitramur omni genere coeptorum, in quibus pro Religionis incremento studium Germaniae catholicae mire exercetur, nullum esse nec uberius, nec opportunius vestro instituto, verissimeque esse dictum catholicos Germanos, Societatem Bonifatianam adiuvantes, maximo omnium officio satis facere".
Quare instantissime precamur, ut Eminentia Vestra delegationem nostram quattuorque sacerdotes praenominatos delegatione fungentes opusque praelaudatum misericordiae christianae Americae populo, quam celerrime fieri poterit, commendare velit. Nam nostri delegati mox profecturi sunt. Quam recommendationem, ut Eminentia Vestra et Apostolico Delegato in Washington, ut certior factus sit ante adventum delegatorum nostrorum, et nobis pro sacerdotibus delegatis per Excellentissimum Domi-
127r
num Nuntium, Dominum Eugenium Pacelli, Monacensem, mittat, enixe humillimeque oramus.Pro Eminentia Vestra benignitate atque liberalitate sincere et ex corde gratias agimus.
Eminentiae Vestrae purpuram deosculans
Praesides generalis Societatis Bonifatianae
d. m.
Prof. Dr. Linneborn, canonicus cathedralis Pad.