Dokument-Nr. 5014
Skala, Jakob
an Pacelli, Eugenio
Bautzen, 03. August 1921
Litteras Excellentissimae Dominationis Vestrae de die 14. Julii magna cum satisfactione recipiens redintegratae dioecesis nostrae pastorem a Beatissimo Patre gratiosissime nominatum: Rssm Dn. Christianum Schreiber, SSmae Theol. et Phil. Doctorem illico telegrammate nomine totius Capituli ex corde salutavi.
Votis neonominati Episcopi obsecundans cum Rev. P. Josepho Watzl, C. SS. R. iter Fuldam aggressus sum, ut oretenus ea pertractarem, quae proximo tempore exsequenda erunt.
Ex itinere redux, quod propter magnum aestum satis laboriosum erat, summo honori mihi duco, id quod telegrammate ad Excellentiam Vestram misso jam significaveram, denuo exprimendi, me totumque Capitulum ad St. Petrum Catholicosque Saxoniae SSmo Patri laetissime obedientes Rssm D. Schreiber in episcopum debita cum reverentia recipere illumque cum filiali amore prosequi velle, ut mutua concordia et adjutorio dioecesis nostra praedilecta efflorescat!
Nomine Capituli ad St. Petrum enixe rogo, ut consecratio novi Antistitis Misnensis per 360 annos a Catholicis Saxoniae ardentissime desiderati, fieri possit durante ipso coetu Rmor. Antistitum Germaniae in Cathedrali Fuldensi die 24. Augusti et quidem, prout ipse
51v
optat, a patre suo spirituali Illmo et Rmo Dno Episcopo Josepho Damiano (Fuldensi)
praesentibus Emmis ac Illmis Patribus caeteris, ita ut olim primus Misnensium episcopus in
cathedrali ecclesia Magdeburgensi praesente copioso coetu antistitum consecratus fuerat,
iste post saecula 42. successor pari cum honore ad episcopatus officium elevetur. Similem
petitionem ad Em. Card. Bertram qua conventus Episcoporum praesidem misi.Placeat Excellentiae Vestrae SSmo Patri nomine Capituli nostri sinceras referre gratias, qui devotissimam obedientiam Apostolorum successori ex corde vovemus.
Interea permaneo cum sensu profundissimae aestimationis
Excellentiae Vestrae
humillimus servus:
Jacobus Skala, Decanus,
nomine totius Capituli.
h. t. Dioecesis Misnensis in Saxonia Administrator et Protonotarius Apostolicus a. i. p.