Dokument-Nr. 16307
Bertram, Adolf Johannes an Pius XI.
Breslau, 10. Februar 1926

Beatissime Pater!
In Districtu Delegaturae Episcopalis Beroliniensis, cujus admisnistratio juxta Bullam "De salute animarum" jam per centum annos pertinet ad Sedem Episcopalem Breslaviensem, cujusque fideles per Berlin, ac Provincias Brandenburgicam et pomeranam dispersi attingunt numerum paene 500.000, tres sunt sacerdotes vere praestantes, quibus tam ob merita saluberrimorum laborum per plura decennia in cura animarum in Delegatura laudabilissime susceptorum quam ad eorum auctoritatem in aestimatione Gubernii et municipiorum utiliter augendam jamdiu impetrare desidero honorem praelaturae cujusdam in Apostolicae Sedis hierarchia. Hi tres viri sunt
I. Parochus Eduardus Cortain 1, in urbe Berlin et Consiliarius Delegaturae supradictae, natus annos 60, sacerdos per annos 35, qui per 26 annos in parochia ad S. Sebastianum exemplari zelo et prudentia inservit curae animarum, quique est Senior inter Consiliarios Officii Delegaturae, prudentia et experientia semper adjuvans gravissimi
99v
momenti deliberationes in urbe capitali Germaniae incessanter surgentes;
huic ut dignitas Praelati Domus Apostolicae 2 concedatur devotissime peto.
Alter est
II. Paulus Steinmann 3, Praepositus in Stettin, urbe capitali provinciae Pomeranae, natus annos 55, sacerdos per 30 annos, qui primo functus munere Secretarii Delegaturae, deinde munere Parochi et Archipresbyteri in Stettin, nunc etiam munere Commissarii Episcopi pro totius provinciae Pomeranae parochiis catholicis laudabilissime fungitur;
huic ut dignitas eadem Praelati Domus Apostolicae 4 tribuatur, supplicare audeo;
III. Bernhardus Lichtenberg 5, parochus in Berlin-Charlottenburg, natus annos 51, sacerdos jam per annos 27, in urbe permagna Charlottenburg cohaerente cum capitali urbe Berlin indefesso zelo, laboribus in publica vita pro conservando catholico scholarum charactere peractis necnon instaurando plures Curatias succursales per extensissimum districtum suae parochiae excelluit, atque insuper industria exemplari per varias dioeceses circuit et colligit media ad haec quatuor nova oratoria succursalia digne perficienda.
100r
Huic exoptare liceat dignitatem Camerarii Secreti honorarii Sanctitatis Vestrae. 6
Quas petitiones si Sanctitas Vestra benignissime implere dignabitur, certe proficiet ad magis augendam filialem populi Delegaturae ad Sanctam Sedem ardentem semper devotionem Cleroque districtus Delegaturae singulari gaudio erit.
Summa humilitate sacrum osculans pedem, permaneo esse
Sanctitatis Vestrae
Obedientissimus servus
A. Card. Bertram.
1"Eduardus Cortain" hds. rot unterstrichen.
2"Praelati Domus Apostolicae" hds. rot unterstrichen.
3"Paulus Steinmann" hds. rot unterstrichen.
4"Praelati Domus Apostolicae" hds. rot unterstrichen.
5"Bernhardus Lichtenberg" hds. rot unterstrichen.
6"Camerarii Secreti honorarii Sanctitatis Vestrae." hds. rot unterstrichen.
Empfohlene Zitierweise
Bertram, Adolf Johannes an PiusXI. vom 10. Februar 1926, Anlage, in: 'Kritische Online-Edition der Nuntiaturberichte Eugenio Pacellis (1917-1929)', Dokument Nr. 16307, URL: www.pacelli-edition.de/Dokument/16307. Letzter Zugriff am: 29.03.2024.
Online seit 29.01.2018, letzte Änderung am 20.01.2020.