Document no. 13563
Kessler, Josef Alois
to [Gasparri, Pietro]
Berlin-Marienfelde, 30 December 1922
Illustrissimus Dominus Nuncius Apostolicus, qui Monaci in Germania habitat, mihi nuperrime, quae e Russia ad S. Sedem relata essent, nuncians, ut quid de iis sentiam, S. Sedi exponam, a me postulavit. Sed ante quam respondeam, in quibus accuser, primum referam necesse est. "In regione hac" – ita auctor ille ad S. Sedem – "(Makeebk, in regione sita inter Kharkov et Rostov) Episcopus nuper nominavit decanum et vicarium generalem sacerdotem abhinc diuturno tempore viventem in quasi concubinatu, patrem filii et filiae, annos natorum plus quam viginti."
Et primum, me unquam ullum sacerdotem, qui in concubinatu sive publico sive notorio viveret, aut de quo mala ferreret fama, decanum aut vicarium generalem nominasse, nego. Quid de concubinis (sacerdotibus sc.) ipse, quid isti de me senserint, aut quid contra eos susceperim, inter omnes sacerdotes et laicos constat. Nam vix Episcopus factus, qui in concubinatu vivebant publico sive notorio a sacerdotio et a fide catholica, ut censuras potissimum ecclesiasticas effugerent, deficere coeperunt. Quam ob rem Dioecesis Tiraspolensis hodie septem habet sacerdotes, qui sacerdotio valedicebant, e quibus quattuor ab ipsa fide catholica, ut matrimonio cum suis concubinis coram gubernio "valido" iungerentur, defecerunt.
Sed quamvis ista ita se habeant, minime tamen potest negari, relatione S. Sedi missa aliquid contineri veri. Anno enim ineunte 1920 cum ob impendens mihi gravissimum necis periculum in Bessa-
87r
rabiam provinciam tum ad Dioecesim Tiraspolensem, hodie vero ad Jassiensem Rumaniaeque Regnum pertinentem, me contulissem, Praelatum Capituli Antonium Fleck Vicarium generalem, qui Dioecesim administraret, Odessae in urbe reliqui. Hic re vera sacerdotem Georgium Baier, de quo olim in clero mala, ac si in concubinatu viveret, fama ferebat, vices gerentem decani nominavit, cui etiam nonnullas facultates Episcopales, ut ego decanis procul a sede Episcopali viventibus ob interruptum atque impeditum ad Curiam dioecesanam et S. Sedem recursum, ne fideles grave paterentur damnum, tribueram, noviter nominato pro eius districtu concessit. Mortuo deinde in feste Ascensionis p. e. subito Vicario generali, a novo Vicario gen. Praelato Josepho Kruschinsky de ista re certior factus, nulla interposita mora, vices decani gerentem munere facultatibusque privavi. At privatus revocationis Decretum ante quam auctor S. Sedi nunciasset non accepisse videtur, quod nemo, qui lentum hodie in Russia commercium consideret, mirabitur. Addo, defunctum Vicarium generalem sacerdotem fuisse bonum, qui semper caste sacnteque vivebat. Quare autem Georgium illum Baier vices decani gerentem et quasi Vicarium generalem in eius districtu nominaverit, nescio. Fortasse famam, quae de isto in clero ferebat, calumnia niti maxime cum multi huius Dioecesis sacerdotes calumnias orientalium more parvi pendere videantur.Quae omnia ita esse coram Deo testificor.
Et haec sunt, quae S. Sedi quoad istam accusationem respondere valeo. Utor denique hac occasione, ut Eminentissimo Principi sensus singularis Exsistimationis meae tester meque profitear
Eminentiae Vestrae Reverendissimae
submissum servum
Josephus Kessler
Episcopus