DEENPrivacy policyLegal disclaimer
TEI-P5

Document no. 18930
[Lokalkomitee der Generalversammlung der deutschen Katholiken (Katholikentag) in Dortmund vom 3. bis 6. September 1927] to Pius XI.
Dortmund, 23 July 1927

Attachment, letter, handwritten

Nunciature’s protocol no. 37865
Archive reference number AAV, Arch. Nunz. Berlino 39, fasc. 4, fol. 135r-143r.
Beatissime Pater!
Maximo nos, civitatis Tremoniensis christifideles, nuntius affecit gaudio Germaniae Catholicorum conventum Wratislaviae in Silesia praeterito anno habitum constituisse solemnem istum conventum qui maximam ex omnibus partibus patriae fidelium multitudinem congregare solet ad profitendam fidem necnon ad disceptandas illas quaestiones quae ad augendam pietatem moresque emendandos praecipue pertinent, hoc anno nostra in urbe Tremonia totius provinciae Westfaliae totiusque dioecesis Paderbornensis longe amplissima, celebrandum esse. Nec minus laetatus est accepto illo nuntio Reverendissimus et Illustrissimus Episcopus noster Casparus, qui ab initio deliberationum nostrarum summo zelo et eximio favore nobis adfuit nec actiones nostras, quas ad optime praeparandum illum Catholicorum coetum instituimus, consiliis suis precibusque prosequi unquam cessavit.
Etenim nobis omnibus persuasum est hunc quem expectamus Catholicorum conventum longe maioris futurum esse momenti illo alio triginta uno annis ante hac in urbe habito, cum et incolarum
137r
numerus tripliciter auctus et rerum publicarum status funditus commutatus sit.
Hac in nostra urbe amplificata mercatura, dilatata industria, multiplicata populatione nec ita multiplicato numero domiciliorum difficillimae istae quaestiones cotidie ante oculos nobis versantur, quae exoriuntur quando productio operum et rerum commercia fere in paucorum potestate redacta sunt, at longe maxima pars hominum praeter operam manuum suarum rem propriam non habent. Nam plus quam tres partes incolarum quorum numerus multo excedit trecenta milia et quorum dimidia fere pars nostram confitetur fidem, opifices sunt, qui in foclinis officinisque durum istud iugum laboris mechanici et saepe bonae valetudini contrarii a iuventute portant, hisce autem temporibus summa premuntur indigentia propter quaestus inopiam. Sed omnes has difficultates clare perspicientes rectores nostri spirituales ducti memorabilibus illis Litteris encyclicis praedecessoris Sanctitatis Tuae Leonis XIII "Rerum novarum" studio indefesso conditionem opificum emendare statumque religiosum et moralem allevare conati sunt. Talium laborum testes sunt viginti tres parochiae cum ecclesiis propriis, quae omnes exceptis quattuor novissimis triginta annis erectae sunt, et undecim oratoria in diversis institutis
139r
caritativis; quattuor orphanotrophia, tria hospitalia, tres domus pro quadringentis viris qui proprium domicilium non habent, tria hospitia senibus destinata. Fideliter autem utentes consiliis sapientibus Summorum Pontificum spectantesque insigne illud et clarissimum exemplum Episcopi Moguntini Wilhelmi Emanuelis liberi baronis de Ketteler, cuius obitum quinquaginta abhinc annis consecutum hoc ipso anno recolimus, varias uniones pias et sociales instituerunt sacerdotes nostri una cum laicis. Hisce societatibus diversis populi necessitatibus adaptatis et commodum temporale et salutem aeternam cooperatione fraterna, filiali erga pastores animarum oboedientia, confidentia semper infracta prosecuti sunt. Neque vero defuerunt fructus operariis in vinea Domini Deo ipso dante incrementum. Ingens enim opificum, artificum, officialium publicorum, mercatorum numerus sodalitiis congregati fidem a maioribus acceptam, ab hominibus perversis acriter impugnatam, strenue defendunt seseque in permultis operibus caritativis adiutores promptissimos semper praestant.
Qui omnes cum fratribus coniuncti, qui tota in patria fortes in fide militant pro Christo Rege, ex conventu Catholicorum Germaniae nostra in urbe habendo bonam spem nutriunt spiritualis progressus. Et sane haud dubium esse videtur,
141r
quin novus ardor certandi in militia Christi efflorescat istis ex orationibus, deliberationibus, consultis. Nam omnia eaque sola agentur quae temporum errores morumque relaxationem ultimis e causis explicare remediaque aegritudinum populo praebere possunt. Non idola sequentes saeculi perversi, sed lumen intuentes catholicae fidei proclamabimus veteres illas et novas semper veritates: Deum esse regem et rectorem mundi, qui veram felicitatem hominum unice intendit, sive bonam fortunam mittit, sive calamitates supervenire permittit; pacem inter eos qui rem eosque qui operam conferunt cum desiderabilem tum possibilem esse, si utrique legem observent evangelii; populum autem febribus languentem non renasci nisi renascatur familia christiana; patriam sincere amanti christiana dilectione non opus esse odio persequi alias nationes; catholicos autem cives Germaniae debere viribus unitis defendere iura sancta et inviolabilia Romanae Ecclesiae. Atque iam oculos convertimus ad Romam aeternam et ad Sedem Apostolicam illius memores dicti: Ubi Petrus, ibi Ecclesia. Confugimus, Beatissime Pater ad Sanctitatem Tuam, cuius natalem septuagesimum gratissimo animo celebravimus et in proximo conventu solemniter acturi sumus. Gratulantes autem imploramus suppliciter Deum omnipotentem, ut Ecclesiam
143r
suam tot tantisque persecutionibus agitatam et afflictam, praesertim in re publica Mexicana, confortare velit benigno suo favore. Nos vero optime laborasse putabimus, si conventus Germaniae Catholicorum Tremoniae habitus contulerit ad hoc, ut in permultis cordibus concivium nostrorum firmetur fides, spes erigatur, caritas inflammetur, ut filii Sanctae Romanae Ecclesiae magis magisque Sedi Apostolicae obstrictos se velint et religiosissime sentire cum Ecclesia studeant. Quam ob rem, Beatissime Pater, Benedictionem Apostolicam impertire digneris tum nobis, quibus munus incumbit conventum istum rite praeparandi, tum universis catholicis totius Germaniae, qui diebus quarto, quinto, sexto mensis Septembris huc convolaturi sunt ad orandum nobiscum, deliberandum, agendum, ut in omnibus, quae tractabuntur, glorificetur Deus omnipotens et exaltetur Sancta Mater Ecclesia!
Sanctitatis Tuae
Humillimi et oboedientissimi filii
Dr. phil. W. Kaiser, praeses.
L. Lensing[.] Roettgers, dec. von Hertling, praepos.
O. Koch. Riekes, secret.
Tremoniae (Dortmund), in festo Sancti liborii patroni dioecesis Paderbonensis MDCCCCXXVII
Recommended quotation
[Lokalkomitee der Generalversammlung der deutschen Katholiken (Katholikentag) in Dortmund vom 3. bis 6.September 1927] to PiusXI. from 23 July 1927, attachment, in: 'Kritische Online-Edition der Nuntiaturberichte Eugenio Pacellis (1917-1929)', document no. 18930, URL: www.pacelli-edition.de/en/Document/18930. Last access: 31-10-2025.
Online since 25-02-2019.
Attachment(s)
Draft(s)/final version(s)
Directive(s)
Linked document(s)
Linked short biographies
Linked keyword(s)
Linking document(s)