Document no. 21402
Twickel, Ludger Freiherr von
to [Pius XI.]
Hamern bei Billerbeck, 25 July 1929
Ludgerus, liber Baro de Twickel,2 catholicus, domiciliatus in pago Billerbeck, dioecesis Monasteriensis in Borussiae provincia Guestfalorum, ad pedes S. V. humillime provolutus supplicem libellum porrigit tenoris sequentis:
Carolus, liber Baro de Merode ipsiusque conjux nobilis Mathildis ex libris Baronibus de Twickel oriunda die 26. julii 1849 testamentum condiderunt disponendo, ut heres ex asse curet:
Primo: ut singulis annis in suo oratorio publico Arcis de Hamern loci Billerbeck die anniversarii obitus utriusque coniugis una missa celebretur simul cum sermone concionatoris habendo; ergo duae missae quotannis celebrandae erant.
Quam testamenti dispositionem superstes coniux Mathildis cum consensu parochi proprii ita mutavit, ut loco sermonis habendi altera missa celebretur cum litaniis in suffragium defunctorum & sacerdoti celebranti stipendium trium marcarum seu trium libellarum aurearum cum tribus quadrantibus solvatur. - Ergo vi huius dispositionis loco duarum missarum quotannis una cum sermone habendo celebrandarum in futurum applicandae erant missae quattuor cum litaniis. - Quo iure dicta Mathildis consulto solo parocho testamentum mutaverit, ex testamento non apparet, ita ut obligatio quattuor missarum imposita valde dubia apparet.3
Secundo: ut singulis annis die anniversarii obitus testatoris Caroli expendantur pauperibus loci 10 thaleri, qui dicuntur, seu 37 libellae4 aureae cum dimidia; die vero anniversarii obitus uxoris Mathildis singulis in hospitali pauperum loci Billerbeck degentibus & missae anniversarii assistentibus distribuantur 15 denarii seu duae fere libellae aureae.5
Orator supra nominatus6 has testamenti Caroli & Mathildis liberorum Baronum de Merode dispositiones humiliter simulque instanter efflagitat in perpetuum mutatas hoc sub tenore:
[2]
Primo: quotannis celebrabuntur quattuor missae in suffragium testatorum in loco ad
normam can. 822 electo sine sermone & sine litaniis; stipendium solvendum saltem ad
normam taxae dioecesanae.7
Secundo: Dispensetur orator a dispositione testamenti quoad eleemosynas dandas.
Rationes libelli supplicis sunt:
1) Vi belli, subsequentis "Inflationis", quae dicitur, enormitatis vectigalium publicorum reditus praedii ex testamento acquisiti valde diminuti sunt.
2) Copiosa familia - septem geniti - nutrienda & convenienter educanda.
3) Pro sustentandis pauperibus loci ipsum municipium imponit tributum singulis civibus; orator ergo aequivalenter satisfacit testamento tum vectigal solvendo pro pauperibus tum exercendo data occasione caritatis opera.
4) Assistentia pauperum ad missam anniversarii vix amplius obtineri poterit; idem dic [sic] de assistentia ad sermonem habendum occasione anniversarii personae privatae.
Quoad praeteritum orator suae obligationi satisfecit.
Et Deus...
Ludgerus liber baro de Twickel8
1↑Seitenzählung von den Editoren eingefügt.
2↑"Ludgerus ... Twickel"
hds. von unbekannter Hand, vermutlich vom Empfänger, in roter Farbe
unterstrichen.
3↑"Ergo ...
apparet" hds. von unbekannter Hand, vermutlich vom Empfänger hds. in roter Farbe am
linken Seitenrand angestrichen.
4↑ "libellae"
hds. von unbekannter Hand, vermutlich vom Empfänger, in roter und blauer Farbe
unterstrichen.
5↑"15 denarii ... aureae" hds. am linken Seitenrand von unbekannter
Hand, vermutlich vom Empfänger, in roter Farbe angestrichen.
6↑"supra nominatus" hds. von unbekannter Hand, vermutlich vom
Empfänger, in blauer Farbe durchgestrichen.
7↑"Primo ... dioecesanae" am linken Seitenrand hds. von
unbekannter Hand, vermutlich vom Empfänger, in roter Farbe angestrichen.
8↑Name hds.
von unbekannter Hand, vermutlich vom Empfänger, blau markiert.