Document no. 4381
Schulte, Karl Joseph
to Pius XI.
Köln, 22 April 1922
Auxiliarius meus Revmus Dnus Franciscus Rudolphus Bornewasser, in civitate Aquisgrani (archidioecesis Coloniensis) ecclesiae collegiatae praepositus, nuperrime Episcopus Trevirensis electus est et proximo mense receptis Apostolicis Litteris canonicam dioecesis Trevirensis possessionem capiet. Novo Auxiliario propter nimiam gregis mei magnitudinem in administranda archidioecesi statim egeo, praesertim quod primus Auxiliarius meus, Coloniae residens, valetudinis imbecillitate laborat. Quapropter mihi liceat Sanctitati Tuae ad officium Episcopi Auxiliaris Coloniensis proponere R. D. Ermannum Straeter. Ex legitimis, catholicis, honestisque parentibus Aquisgrani (archidioecesis Coloniensis) progenitus, in quinquagesimo sexto aetatis suae anno est constitutus. Presbyteratus ordine et in s. theologia dudum doctorali laurea donatus ad functiones ecclesiasticas peragendas – per aliquot tempus etiam in instituti –
119v
one alumnorum seminarii theologici scientifica et religiosa – laudabiliter incubuit. In urbe Crefeld (archidioecesis Coloniensis) parochi necnon decani munere summa cum laude perfunctus est. Vir doctrina, gravitate, prudentia, morum honestate, rerumque usu praeditus, dignus eapropter est censendus, qui ad Episcopi dignitatem promoveatur.Ex parte gubernii Borussici difficultates ordinis politici quoad laudatum virum ecclesiasticum a me ad dignitatem Episcopi Auxiliaris propositum non obiicientur. Insuper idem gubernium, ad quod juxta normam Apostolicis Pii PP. VII f. r. Litteris "De salute animarum" traditam jus praesentandi spectat, per nuntium me certiorem fecit jam nunc se consentire futurae Papali collationi dignitatis praepositurae in collegiata B. M. V. ecclesia Aquisgrani, quae dignitas per promotionem Episcopi electi Trevirensis vacabit et de qua vacante novo Auxiliario meo conferenda Sanctitatem Tuam proprio libello suppliciter adibo.
Ad osculum Sanctitatis Tuae humillime pro-
120r
volotus enixe supplico, ut ex Tua Apostolica benignitate commemoratus sacerdos Ermannus Straeter ad Episcopi dignitatem et Auxiliarii mei munus promoveatur et quamprimum processus informativus introducatur.Paternam benedictionem petens
Sanctitatis Tuae
humillimus, obedientissimus,
addictissimus servus et filius
Carlus Josephus Cardinalis Schulte,
Archiepiscopus Coloniensis.