Dokument-Nr. 14746
Schmidt, Joseph Damian
an Sbarretti, Donato Raffaele
Fulda, 23. November 1925
Joseph Damianus Episcopus Fuldensis ad Sanctitatis Vestrae pedes humillime provolutus sequentia exponit.
Constantinus Gutberlet, iam sexagesimum quintum sacerdotii sui agens annum, qui antehac folia periodica "Philosophisches Jahrbuch" redigebat edebatque, anno 1893 cuidam parocho Nicolao Tinc, sacerdoti dioecesis Gherlensis, Armenopolitanae, in Rumenia, bona fide plures missas (intentiones) celebrandas assignavit, quarum stipendia seu eleemosynae solutioni pretii subnotationis annuae pro praefatis foliis periodicis inserviebant; de quo conferatur testimonium hisce litteris involutum. Jamvero nuper ipsi dubium supervenit, num revera dictus licuerit tali parocho Gherlensi Missas tribuere. Ordinarius Gherlensis hac de re quaesitus respondit uti ex accluso patet. Cum hoc responsum non omne tollat dubium, Constantinus Gutberlet enixe supplicat, ut Sanctitas Vestra ipsi ad cautelam saltem sanationis gratiam impertiri ne dedignetur, si qui defectus in hoc casu et etiam in aliis similibus casibus, qui speciales accurate indicari nondum possunt, revera irrepserint.
Quas preces ad consulendum conscientiae oratoris, qui fulgore et doctrinae suae et morum vitaeque sacerdotalis integritatis eximie de ecclesia meritus existit, summopere commendo in Domino.
Et Deus etc.
+ Joseph Damianus,
Episcopus Fuldensis.