Dokument-Nr. 2952
Middendorf, Arnold
an Pius XI.
Köln, 17. November 1922
Spiritus Sanctus postquam Te posuit regere Ecclesiam Dei, gratias egimus Deo Omnipotenti, quod in persona Tua veneranda ac illustrissima Ecclesiae dedit caput et principem ingeniosum omnibusque Ecclesiae filiis patrem benignum. Cui Deus Optimus tribuat semper plenitudinem gratiae sublevetque labores et onus muneris Vicariatus Christi in terra!
Benignitas Tua iam per terrae orbem divulgata accipere dignetur preces, quas abhinc tertio ante anno Praedecessori Tuo Benedicto PP. XV piae felicissimaeque memoriae longius exposuimus. Ad quas litteras supplices per manus Excellentissimi et Reverendissimi Domini Eugenii Pacelli, Nuntii Apostolici in Germania et Archiepiscopi Sardian., traditas hic expresse provocamus et novum exem-
3v
plar istius libelli hisce adiungimus.Cum articulus 137 novae legis de forma rei publicae Germanicae societatibus ecclesiasticis in Germania pro conferendis beneficiis libertatem reddat, conventiones ineunte saeculo undevicesimo inter Borussiae regem aliosque principes et Sedem Apostolicam initae mutari vel aboleri debent. Quare capitula cathedralia Borussiae in memoriam revocantia privilegia pristina a Sancta Sede sibi benigne concessa instantissime orant, ut Sanctitas Vestra eisdem capitulis ius eligendi episcopum confirmare vel concedere dignetur. Quod indultum per tot saecula traditum, probatum consecratumque, ut conservetur non solum electores, canonici videlicet numerarii et honorarii, sed etiam episcopi ipsi omnisque populus Germanicus devotissime exoptant et implorant.
Jus nominandi candidatum, cum canonicatus vacaverit, quod attinet, in Ecclesiis cathedralibus antiquae Borussiae dictae: Coloniensi, Treverensi, Monasteriensi, Paderbornensi, Warmiensi, Wratislaviensi necnon in Ecclesia collegiata Aquisgranensi hucusque Rex Borussiae canonicatus in mensibus Januarii, Martii, Maii, Julii, Septembris ac Novembris vacantes, episcopus vero canonicatus in aliis
4r
sex mensibus vacantes contulit. In dioecesibus Borussiae novae: Osnabrugensi, Hildesiensi, Fuldensi, Limburgensi canonicos regi non ingratos alternis vicibus episcopus et capitula nominaverunt. Quacunque interventione Regis vel Gubernii nunc exclusa omnia et singula capitula Borussiae Sanctitati Vestrae proponunt, ut praedictis capitulis ius conservet vel concedat nominandi alternis vicibus cum episcopo candidatos, si canonicatus vacaverint.Sed in conferendis dignitatibus Sanctitati Vestrae fortasse non idem modus placebit. Quare denuo oramus, ut novus pro canonica provisione dignitatum et canonicatuum in Borussia sic statuatur: In capitulis Ecclesiarum Cathedralium Coloniensis, Treverensis, Monasteriensis, Paderbornensis, Warmiensis, Wratislaviensis necnon Ecclesiae collegiatae Aquisgranensis Praeposituram, quae est prima dignitas capituli, conferat Sancta Sedes; secundam dignitatem, decanatum scilicet, et omnes vicariatus conferat Episcopus. Sed quotiescumque in capitulis Osnabrugensi, Hildesiensi, Fuldensi, Limburgensi decanatus, qui in hisce capitulis unica dignitas est, aut vicariatus vacaverit, episcopus et capitulum alternis
4v
vicibus novum decanum aut vicarium nominent.Beatissime Pater! Ista privilegia et Apostolicam Benedictionem dare digneris
Tuis filiis humillimis et obedientissimis praepositis, decanis, canonicis Capitulorum Cathedralium Borussiae.
Pro quibus subscripsit
Arnoldus Middendorf
Praepositus Capituli
Metropolitani Coloniensis.